A Igrexa San Xosé acolle este domingo o IV Certame de Panxoliñas Concello de Ares

FERROL360 | Sábado 20 decembro 2014 | 18:59

Unha das actividades máis exitosas do programa de festas de Nadal do Concello de Ares, é sen lugar a dúbidas, o IV Certame de Panxoliñas Concello de Ares. Una actividade coa que colabora a parroquia de San Xosé e precisamente a igrexa da vila acollerá este domingo a actuación a partires das 19:00 horas.

Neste certame actuarán as seguintes formacións de Ares: o Coro de Voces Amigas de Ares; a Coral Polifónica Casino Aresano; o Coro Parroquial Xuvenil de Ares; o Coro Parroquial de Adultos de Ares; o Coro Parroquial de Redes; a Escola Municipal de Música, a Escola de Música da Asociación Cultural Xábrega; o Grupo Mandala Gospel; e a Rondalla Trovadores de Ares.

Fernández Lago, edil de Cultura de Ares, asegura que o obxectivo desta iniciativa non é outro que o de recuperar unha tradición como é a de cantar panxoliñas durante estas datas. Ademais de cantigas de sempre, algunhas das agrupacións que actuarán no certame, introducirán panxoliñas inéditas, compostas polos seus integrantes.