Ferrol360 Un giro a la actualidad comarcal.
FERROL360 | Xoves 13 outubro 2016 | 12:09
Un ano máis a Asociación Cultural o Abordelo organiza o festival de música galega Grelo Folc, que nesta edición cumpre 17 anos. O adro do Mosteiro de Monfero acollerá as actividades, que se desenvolverán ao logo de toda a xornada do sábado 15 de outubro. Haberá sesión vermú, xantar popular, actividades infantís e actuacións variadas, a partires das 22:00 horas.
A festa arrancará cunha sesión vermú a cargo da charanga Os veraneantes. A continuación, terá lugar un xantar popular para o que hai que anotarse nos teléfonos: 679 251 163 ou 698 166 277, ou a través do correo: oabordelo@gmail.com.
Os peques da casa gozarán do seu festival particular: A Nabiciña. Así, a partir das 16:00 horas haberá xogos e actividades infantís. Xa ás 18:00 horas comezará o concerto do grupo eumés de música infantil Palitroke. Ademais, haberá merenda gratuíta para todos os nenos.
Os concertos do festival, que será de balde, comezarán a partir das 22:00 horas coas seguintes actuacións: No Cómbaro, coa súa música tradicional feita nas Pontes; O Puto Coro do Exército Froilanista, coa súa retranca musical da banda oficial do Partido Froilanista; Sonoro Maxín, cos seus ritmos descompasados e Muebles Mendoza, unha banda de versións dos compoñentes de Familia Caamagno.
O festival contará cunha carpa e zonas de acampada libre.
