Ferrol360 Un giro a la actualidad comarcal.
Membros da AGFA do Eume acoden regularmente a supervisar e manter a horta de froiteiras autóctonas de San Sadurniño (Foto: Ferrol360)
Coñecer ben de cerca a nosa flora e o entorno natural é algo que está ao noso alcance e que a longo prazo ofrece recompensa.
O concello de San Sadurniño, en colaboración coa Asociación Galega de Froitas Autóctonas (AGFA) do Eume organizan para o mes de outubro un curso teórico e práctico de fruticultura.
Saber cando plantar ou podar unha árbore para obter unha boa produción ou evitar as pragas e enfermidades que ameazan ás nosas froiteiras, son algunhas das cuestións que se abordarán nestas sesións que se desenvolverán ao longo de 21 horas de duración. Malia que aínda se descoñece a data de inicio -cómpre agardar para facer un grupo mínimo de 15 persoas-, a actividade levarase a cabo durante sete días de outubro en horario de 19:00 a 22:00 horas.
O profesorado serán expertos pertencentes á Asociación Galega de Froita Autóctona do Eume, unha entidade coa que o Concello ten subscrito un convenio de colaboración que inclúe o mantemento anual das froiteiras e tamén a organización de accións formativas.
Para participar no curso que oferta ata 25 prazas, hai que ser maior de 18 anos e inscribirse na casa da cultura. O prezo é de 25 euros por persoa.
