Home / Actualidad / As Marchas da Dignidade de Ferrolterra reclaman a creación dun plan de emprego comarcal

As Marchas da Dignidade de Ferrolterra reclaman a creación dun plan de emprego comarcal

REBECA COLLADO | Ferrol | Luns 8 febreiro 2016 | 17:31

Unha representación das Marchas da Dignidade de Ferrolterra entregaron este luns no Rexistro do Concello de Ferrol un escrito no que demandan a posta en marcha dun plan comarcal de choque contra o paro e de creación de emprego. Un documento que están a entregar nos distintos Concellos da comarca.

Ignacio Martínez, voceiro da entidade no acto, reclamou que sexan os Concellos os que realicen unha contratación directa «para paliar o problema de desemprego que hai nesta comarca». Unhas contratacións que deberían estar ligadas ao medio ambiente e á recuperación da cidade, no caso de Ferrol, salientou Martínez.

Desde as Marchas denuncian que os plans de emprego que se están levando a cabo «non solucionan o problema do desemprego» e engaden que «hai moitas empresas que recibiron axudas públicas e pecharon ou despediron ós traballadores», en alusión ao Plan Ferrol.

Confían desde o movemento que os cambios políticos nas corporacións serán positivos para as súas demandas, iso si «non hai que poñer desculpas e poñerse mans á obra», reclamou Martínez. Así, avanzou que van presionar aos Concellos para que se marquen o problema do desemprego coma unha prioridade, «algo a solucionar e a tratar», concluíu.

Asimesmo, no escrito piden manter unha entrevista cos distintos gobernos municipais para coñecer as súas propostas en materia de emprego.

Durante a presentación do escrito lembraron que en marzo de 2015 entregaron tamén nos Rexistros da Xunta de Galicia e do Concello de Ferrol 1.325 sinaturas en demanda dun plan de choque contra o paro, no que urxían a contratación das persoas en difícil situación e unha renda básica para aquelas persoas que non perciben ningún ingreso.

Comentar

Su dirección de correo electrónico no será publicada.Los campos necesarios están marcados *

*

En Ferrol360 utilizamos cookies para que tengas la mejor experiencia de usuario. Si continúas navegando, estás dando tu consentimiento para la aceptación de las mencionadas cookies y la aceptación de nuestra política de cookies. Puedes pinchar el enlace para tener más información. ACEPTAR
Aviso de cookies