Ferrol360 Un giro a la actualidad comarcal.
Composteiro que recibirán os veciños interesados (foto: Concello Cabanas)
FERROL360 | Venres 13 setembro 2019 | 10:08
O Concello de Cabanas, a través da Concellaría de Medio Ambiente, vén de pór en marcha un plan de compostaxe doméstico, que ten como principal obxectivo a implicación da veciñanza na redución dos residuos xerados, contribuíndo así a mellorar o medio ambiente e, ao tempo, reducir a factura anual de recollida de lixo.
Para facilitar a participación da veciñanza nesta iniciativa, o Concello de Cabanas repartirá, en colaboración con SOGAMA e de maneira gratuíta, composteiros de uso doméstico de 400 litros de capacidade, que serán entregados por orde de petición.
O prazo para solicitar un composteiro xa está aberto e as persoas interesadas deben entregar no Rexistro unha instancia que poden atopar tanto na páxina web cabanas.gal como nas oficinas municipais, co compromiso de participar no plan e asistir a unha formación presencial sobre o tema que se realizará unha vez que se complete o reparto.
A compostaxe fai posíbel a eliminación da fracción húmida dos residuos sólidos, que é a máis pesada e a que supón maior custe de tratamento, dun xeito natural e outorgando a eses residuos unha segunda vida como abono.
