Home / Cultura / Caraveis vermellos, contacontos e obradoiros para conmemorar o Día de Rosalía de Castro este venres

Caraveis vermellos, contacontos e obradoiros para conmemorar o Día de Rosalía de Castro este venres

FERROL360 | Xoves 23 febreiro 2017 | 10:53

Este venres, 24 de febreiro, celébrase o Día de Rosalía de Castro e cúmprense 180 anos do seu nacemento. Para conmemorar unha data tan especial, hai organizados varios actos entorno á figura da escritora galega máis universal. Así, haberá entrega de caraveis vermellos, contacontos e obradoiros, entre outros.

En Narón, a programación dará comezo ás 12:00 horas coa lectura dunha serie de textos de Rosalía de Castro nas instalacións da Biblioteca municipal e na que participarán edís do Concello, persoas a título particular e a actriz Flor Maceiras, que lerá un manifesto redactado pola Asociación de Escritoras e Escritores en Lingua Galega.

Xa ás 20:00 horas, no Café Teatro do Pazo da Cultura, terá lugar a presentación audiovisual e a presentación do libro Airiños Aires de Rosalía, do fotógrafo galego Xurxo Lobato, na que se evoca a vida e obra de Rosalía de Castro.

Como novidade, este ano oito librarías da localidade –Albatros, Breogán, Contos, Cousas, Day, Galicia, Nany e Nova- agasallarán cun caravel vermello a todas aquelas persoas que merquen un libro escrito en galego. Esta mesma proposta trasladarase á Biblioteca municipal, de xeito que as persoas que leven prestada algunha publicación escrita en galego recibirán un caravel vermello.

Actividades en Ferrol

O Antigo Hospicio acollerá este venres unha sesión de contacontos ilustrado para cativos a partires dos tres anos. Será ás 19:00 horas e o acceso é libre e de balde ata esgotar o aforo. Terá unha duración estimada de 60 minutos para falar e debuxar a vida e obra de Rosalía de Castro.

A actividade rematará cun obradoiro de ilustración no que cada asistente realizará unha caricatura de Rosalía. Os nenos participantes recibirán un agasallo como lembranza da súa participación e esforzo.

No Ateneo Ferrolán celebrarán un acto este venres, ás 20:00 horas, no que participarán Rosa Martínez, Aurora Varela, Antón Cortizas e Rosa Méndez. O acto está aberto á participación e desde a entidade animan á veciñaza a sumarse e ler algún poema da nosa ilustre autora.

Moeche e Neda

Neda únese á celebración deste día dando a coñecer poemas da autora entre a poboación e colocando unha banda na balconada da Casa do Concello na súa homenaxe. Ademais, no IES Fernando Esquío traballarase coa súa poesía e a súa imaxe nun obradoiro de pintado de camisetas e chapas.

Moeche conmemorá o Día de Rosalía de Castro o vindeiro 2 de marzo, pola coincidencia co Entroido. Co fin de maner vivo o seu legado entre os máis novos, desenvolveranse dous obradoiros para os menores do municipio.

Así, para nenos de 3 a 7 anos haberá o obradoiro A paisaxe de Rosalía, que consiste nun percorrido pola infancia de Rosalía a través da súa obra coa realización dun mural.Para os menores de 8 a 12 anos, desenvolverase o obradoiro Rosalía na miña camisola, no que os participantes recibirán unha camisola na que debuxarán unha imaxe baseada nuns versos de Rosalía que eles escollan.

Comentar

Su dirección de correo electrónico no será publicada.Los campos necesarios están marcados *

*

En Ferrol360 utilizamos cookies para que tengas la mejor experiencia de usuario. Si continúas navegando, estás dando tu consentimiento para la aceptación de las mencionadas cookies y la aceptación de nuestra política de cookies. Puedes pinchar el enlace para tener más información. ACEPTAR
Aviso de cookies