Home / Actualidad / Estás pensando en mercar, alugar ou rehabilitar unha vivenda? Infórmate das axudas dispoñibles

Estás pensando en mercar, alugar ou rehabilitar unha vivenda? Infórmate das axudas dispoñibles

Imaxe da sesión informativa celebrada en Pontevedra (foto: Xunta)

FERROL360 | Venres 4 marzo 2022 | 9:11

Na actualidade existen distintas liñas de axudas para mercar, alugar e rehabilitar unha vivenda, que poden supoñer un incentivo interesante para a veciñanza e os concellos. Co obxectivo de ofrecer unha información práctica e áxil sobre os distintos programas dispoñibles, a Xunta de Galicia organiza un encontro informativo en Ferrol para abordar as convocatorias vixentes.

A sesión, que leva por título Construíndo Fogar, terá lugar o vindeiro luns 7 de marzo, ás 10.30 horas, na Delegación Territorial de Ferrol. No encontro participará persoal do Instituto Galego da Vivenda e Solo (IGVS), que informará de xeito pormenorizado sobre a trintena de axudas existentes e resolverá as dúbidas das persoas asistentes.

Nesta cita pode participar o público en xeral e están convocados os concellos, empresas e entidades do sector de Ferrolterra, Eume e Ortegal. Entre as entidades convidadas figuran os colexios oficiais de arquitectos, enxeñeiros técnicos e peritos agrícolas, empresas inmobiliarias, xestores de comunidades de veciños e da propiedade e asociacións de empresarios e da construción.

Os requisitos que deben cumprir as persoas ou institucións beneficiarias de cada axuda, os trámites a realizar para acceder ás convocatorias, tanto as que están abertas como as pendentes de publicar, son algunhas das cuestións a tratar na sesión informativa.

O persoal do IGVS dará conta dos programas dispoñibles para fomentar a rehabilitación de vivendas, tanto os dirixidos a particulares como aqueles que se destinan exclusivamente aos concellos. Entre outras, abordaranse as axudas á área de rehabilitación supra municipal dos Camiños de Santiago, que inclúe a Ferrol, Neda, Fene, Cabanas e Pontedeume, municipios polos que discorre o Camiño Inglés.

Tamén se especificarán as diferentes subvencións que existen para facilitar o acceso a unha vivenda en réxime de compra ou de alugueiro. No caso da adquisición de vivendas, existe unha liña específica para mercar nos centros históricos de Ferrol, Mugardos, Neda e Pontedeume.

Desde a Consellería de Medio Ambiente valoran estes encontros informativos como necesarios e fundamentais para dar a coñecer a existencia das liñas de subvencións dispoñibles en materia de vivenda.

O departamento autonómico busca con esta proposta animar ás posibles persoas beneficiarias a presentar unha solicitude, ofrecendo información directa e útil, así como brindar o acceso aos recursos públicos ao destinatario final dos mesmos: a sociedade galega.

Comentar

Su dirección de correo electrónico no será publicada.Los campos necesarios están marcados *

*

En Ferrol360 utilizamos cookies para que tengas la mejor experiencia de usuario. Si continúas navegando, estás dando tu consentimiento para la aceptación de las mencionadas cookies y la aceptación de nuestra política de cookies. Puedes pinchar el enlace para tener más información. ACEPTAR
Aviso de cookies