Ferrol360 Un giro a la actualidad comarcal.
FERROL360 | Domingo 23 abril 2017 | 12:30
O 15 de abril de 1917 comezou a andaina oficial da Irmandade da Fala ferrolá na rúa Real 27, daquela local da rondalla Airiños d’a Miña Terra. O Concello de Ferrol e o Real Coro Toxos e Froles celebraron este sábado a efeméride descubrindo unha placa conmemorativa nese mesmo lugar, que na actualidade conta cun número distinto, o 65.
O coro decano, impulsor tanto das Irmandades da Fala en toda Galicia como na cidade de Ferrol, participou entoando a Foliada de Ribadeo e o Himno Galego, pero tamén facendo unha lectura dramatizada, a través dos coristas Eliseo Zaera e Pipo Arribe, de Mal de moitos, unha peza teatral que subiron ás táboas hai un século dous dos seus fundadores, Charlón e Hermida.
O alcalde ferrolán, Jorge Suárez, destacou que «defender a lingua é un acto de valentía», lembrando a aqueles homes e mulleres unidos polo amor á terra que decidiron, a través das artes e a intelectualidade, espallar e pór en valor a lingua galega.
O presidente do coro, Arturo Lamas, e o rexedor descubrindo a placa no 65 da rúa Real (foto: Concello de Ferrol)
