Ferrol360 Un giro a la actualidad comarcal.
FERROL360 | Domingo 25 xullo 2021 | 14:53
O Concello de Ferrol quere promover a creación artística de mulleres cineastas galegas coa celebración do ciclo de cine Cima en Curta. Trátase dunha iniciativa en colaboración coa Asociación de mulleres cineastas e de medios audiovisuais e os Cines Dúplex, onde terá lugar a sesión o vindeiro venres.
Proxectaranse cinco curtametraxes e a continuación se celebrará un debate co público e as autoras. As entradas, de balde, repartiranse desde o mércores 28 de xullo no despacho de billetes do Cine Dúplex ata completar o aforo establecido pola situación epidemiolóxica do momento. A cita comezará ás 19.45 horas.
O concelleira de Muller e Igualdade, Cristina Prados, explicou que o obxectivo da iniciativa é «dar a coñecer os traballos realizados por mulleres cineastas», así como «promover o debate sobre a creación cinematográfica das mulleres no contexto particular de Galicia co fin de apoiar a súa presenza na industria audiovisual».
As curtametraxes que se proxectarán son as seguintes: Muller Personaxe, de Lucía Estévez; Dores, de Coral Piñeiro; Xoves de comadres, de Noemí Chantada; Carne, de Camila Kater e Chelo Loureiro como
produtora e Terceira oportunidade, de Xudit Casas.
No coloquio que se celebrará a continuación das proxeccións participarán as autoras e as moderadoras Patricia de Luna, de Cima en Curta, e Elena García Román, de Cima Galicia.
