Ferrol360 Un giro a la actualidad comarcal.
REBECA COLLADO| Ferrol | Mércores 20 xaneiro 2016 | 11:21
Este sábado o Teatro Jofre vestirase de gala para acoller a presentación do último traballo do grupo de folk ferrolán Lenda Ártabra. «Noites de Lenda» compónse de cancións tradicionais e temas propios do grupo, que mestura distintos estilos para imprimirlle á súa música un selo propio e moi característico.
Alberto Hermáns, Marta Masafret, Salva Vader, Jose María Bastida, Álex Lorenzo e Mundo Bakala, subiranse de novo ao escenario do Jofre avalados pola gran acollida que tivo o seu directo durante as pasadas Festas de Verán. Unha cita ineludible, que arrancará ás 20:30 horas e para a que xa non hai entradas.
FERROL360 – Este sábado presentades no Jofre o voso último disco, «Noites de Lenda». Son todas composicións propias ou incluídes tamén temas tradicionais?
ALBERTO HERMÁNS – «Noites de Lenda» é un traballo que inclúe 14 cancións. Dentro deses temas hai cancións tradicionais como Foliada do Folgoso, letras tradicionais con música nosa e canción orixinais de letra e música. A maioría dos temas son, musicalmente falando, de creación propia.
360 – A entrada para o concerto é gratuíta. Aínda quedan entradas?
AH – As entradas estaban a disposición do público na billeteira do Jofre dende o martes 12 de xaneiro, e temos a satisfación de dicir que para o concerto de presentación do noso primeiro disco colgaremos o cartaz de «non hai entradas».
360 – Onde se pode conseguir o disco? E desde cando está á venda?
AH – Parece ser que o noso número da sorte é o 23. Un 23 de agosto tocamos por primeira vez no Teatro Jofre, o 23 de decembro se puxo o disco á venda e un 23 de xaneiro o presentaremos no Jofre. «Noites de Lenda» pódese mercar en Clef Music, M4, Frecuencia, Cantina de Sedes, entre outros.
360 – Lenda Ártabra mestura diferentes estilos, como o folk galego, fado portugués, música clásica e ritmos africanos, como acolle o público esta integración de xéneros?
AH – A verdade foi algo que nos sorprendeu gratamente. Á xente lle preguntamos cal é a canción do disco que máis lle gusta e non hai unha canción favorita clara para todos. Á xente lle gusta o disco en conxunto pero cada un ten a súa favorita. Nós o interpretamos positivamente porque quere dicir que «Noites de Lenda» está cheo de 14 cancións para todos os gustos.
360 – Lenda Ártabra xa se ten feito un oco no noso panorama musical, como foi esa andadura desde 2013 ata o día de hoxe?
AH – A verdade é que a vida do grupo non pasa practicamente dos dous anos pero dende un primeiro momento tiñamos claro que este proxecto ía en serio e que o noso primeiro obxectivo foi a preparación dun repertorio adecuado para concertos en directos e a gravación dun disco.
360 – Tedes pechada algunha actuación máis na comarca para dar a coñecer o disco?
AH – Agora con «Noites de Lenda» temos a mellor carta de presentación de cara ás contratacións. Na comarca, un grupo como o noso que move moitos músicos, non ten moita cabida en pubs porque o espazo é insuficiente, as nosas actuacións concéntranse en verán. Temos contactos para tocar en festivais no verán en Asturias, en Cantabria e no norte de Portugal. Agardamos poder tocar ben prontiño outra vez na nosa cidade como xa fixemos na Sala SUPER8 e o Café Derby.
