Home / Sociedad / Tendencias / Gastronomía / Máis de 40 expositores participarán esta fin de semana na XVI Feira do Mel de Narón

Máis de 40 expositores participarán esta fin de semana na XVI Feira do Mel de Narón

FERROL360 | Xoves 6 outubro 2016 | 14:07

A concelleira de Feiras e Mercados de Narón, Mar Gómez, presentou este xoves o programa da décimo sexta edición da Feira do Mel, que se celebrará no recinto feiral do Trece este sábado e domingo. A cita contará coa participación de máis de 40 expositores de produtos ecolóxicos e artesanais co mel como principal reclamo.

Así, cóntase coa presenza de pequenos e medianos produtores hortofrutícolas, como legumes, queixos, marmelos, aceites, infusións ou cervexas, así como doutras manufacturas en coiro, madeira, xoiaría en prata ou cosméticos, entre outros. A feira desenvolverase en horario de 10:00 a 14:00 horas e de 16:00 a 20:00 horas.

Como en edicións anteriores, está prevista a participación activa dun bo número de membros da delegación de Ferrolterra da Asociación Galega de Apicultura –AGA-, que aproveitarán a ocasión para dar a coñecer a súa actividade e atenderán ás persoas interesadas nesta actividade que cada ano ten máis adeptos.

A edila Mar Gómez animou a veciñanza de Narón e do resto da comarca a se achegar a fin de semana ao Trece para gozar dunha xornada na que a gastronomía ocupará novamente un lugar moi importante, con degustacións de balde de diferentes produtos, mais na que haberá tamén actividades paralelas dirixidas nomeadamente ás crianzas.

É o caso dos inchables e os obradoiros de monicreques de cartón. Tanto a rapazada como as persoas adultas poderán participar tamén nun pequeno magosto amenizado cunha actuación musical as dúas xornadas, de 12:00 a 14:00 horas.

Comentar

Su dirección de correo electrónico no será publicada.Los campos necesarios están marcados *

*

En Ferrol360 utilizamos cookies para que tengas la mejor experiencia de usuario. Si continúas navegando, estás dando tu consentimiento para la aceptación de las mencionadas cookies y la aceptación de nuestra política de cookies. Puedes pinchar el enlace para tener más información. ACEPTAR
Aviso de cookies