Narón abre o prazo de matrícula en tres cursos dirixidos a mulleres desempregadas do municipio

FERROL360 | Mércores 16 setembro 2015 | 11:15

Igualdade por medio da educación, confección e organización, e xestión familiar, son os tres cursos que a Concellería de Igualdade de Narón pon en marcha a través do II Plan Municipal de Igualdade. O prazo de matrícula para inscribirse nestes programas xa está aberto e estarán dirixidos a mulleres desempregadas do municipio e maiores de 18 anos.

O curso de Igualdade por medio da educación desenvolverase desde o mese de outubro e ata o mes de xuño na Casa da Mocidade. As clases serán os luns, mércores e xoves en horario de 16.30 a 19.30 horas. Hai 25 prazas e as participantes formaranse en lectura, escritura, xeografía, inglés, galego e cálculo.

O obradoiro de Confección impartirase nos mesmos meses no Centro Municipal de Formación, coa finalidade de que as asistentes adquiran destreza no manexo da máquina de coser, aproveitamento de materiais e patronaxe. En total haberá vinte participantes, que se distribuirán en dous grupos en función dos seus coñecementos previos.

Así, haberá un grupo terá clases os luns, mércores e venres de 09.30 a 12.30 horas e o outro os martes e xoves de 09.30 a 12.30 horas. Nas clases, as alumnas recibirán os coñecementos necesarios para poder elaborar pezas de vestir, desenvolvendo a súa creatividade e abaratando os custos derivados de mercar roupa.

Un total de 48 mulleres son as destinatarias do obradoiro de Organización e xestión familiar, que se desenvolverá de outubro a xuño na Casa da Mocidade e no colexio de San Mateo. As clases serán en dous grupos: un deles o luns, mércores e venres de 09.30 a 12.30 horas e o outro os martes e xoves de 09.30 a 12.30 horas.

As sesións permitirán formar ao alumnado en habilidades que melloren os seus hábitos domésticos e dotalas doutras de carácter social e prelaboral, como xestión económica e do tempo, alimentación, organización do traballo e desenvolvemento de roles familiares, entre outros.

As interesadas en participar deben presentar as instancias, xunto cunha fotocopia do DNI e outra da tarxeta de demandante de emprego, no Rexistro Xeral do Concello, en horario de 08.30 a 13.00 horas. O prazo de inscrición rematará o vindeiro 29 de setembro.

Para obter máis información sobre estes cursos pódese chamar ao Servizo Sociocomunitario Municipal, ao número de teléfono 981 337 700 (extensións 1113 e 1115). As prazas cubriranse por rigorosa orde de inscrición, sendo necesario superar unha proba de nivel moi básica entre os admitidos no curso de Confección.