Ferrol360 Un giro a la actualidad comarcal.
FERROL360 | Mércores 20 xaneiro 2016 | 17:00
O Concello analiza a viabilidade de colaborar coas autoescolas do municipio para impartir sesións teóricas e prácticas sobre Seguridade Vial dirixidas a diferentes colectivos. O obxectivo é concienciar á poboación en xeral e, aos escolares e condutores noveis en particular, sobre esta temática.
O equipo de Seguridade Vial do Concello de Narón desenvolve desde hai anos un programa sobre este ámbito nos centros escolares e hai uns días se levou a cabo na autoescola Ruta 24-Cofepa.
«Cando só un pouco máis é perigoso» é o título desta actividade que consiste en «impartir unha charla aos alumnos dos centros e, neste caso, das autoescolas, sobre os perigos do consumo de drogas e alcol e os seus efectos na condución», segundo explicou o concelleiro de Seguridade Guillermo Sánchez Fojo.
Esta actividade permite incrementar a percepción do risco dos participantes utilizando unhas lentes que alteran a visión ao simular diferentes equivalencias de niveis de alcol en sangue. A intención do Concello é realizar esta formación co alumnado das autoescolas, así que xa se iniciaron conversas cos cinco centros ubicados na localidade.
Con esas gafas, que alteran a visión ao simular diferentes equivalencias de niveis de alcol en sangue, os alumnos de Ruta 24-Cofepa realizaron diferentes manobras e sortearon obstáculos, unha tarefa que se complicou para eles a medida que se incrementaba a graduación.
«Sabemos que a concienciación é un dos pilares fundamentais para que neste caso os condutores noveis coñezan o perigo que supón o feito de poñerse ao volante baixo os efectos do consumo de alcol ou de drogas», apuntou Sánchez Fojo.
