Ferrol360 Un giro a la actualidad comarcal.
FERROL360 | Xoves 20 marzo 2014 | 13:52
Dende este xoves, a veciñanza de San Sadurniño poderá comezar a facer uso dunha plataforma de administración electrónica. Este espazo virtual, ao que se pode acceder dende a páxina web do municipio, permite realizar una serie de trámites pola internet coa mesma validez que tería acudir ao rexistro municipal.
Para usar este servizo só é necesario dispoñer de DNI electrónico ou sinatura dixital. As súas vantaxes con respecto á administración tradicional son que está operativa durante as 24 horas dos 365 días do ano. Ademais, o usuario non precisará saír da casa para realizar todo tipo de trámites telemáticos, solicitudes, consultar expedientes ou representar a outra persoa á hora de realizar unha instancia.
Dende o consistorio, sinalan a súa intención de dar o salto á «administración sen papel», cumprindo ademais coa Lei 11/2007 de Acceso Electrónico dos Cidadáns aos Servizos Públicos, doutando de medios técnicos necesarios para que este dereito sexa «plenamente efectivo» para toda a cidadanía.
A sede electrónica garante en todo momento a identidade, integridade e autenticidade do cidadán a través dos certificados electrónicos. Ademais, dispón dun rexistro telemático que acredita e certifica estas transaccións de información.
Antes de comezar a facer uso desta plataforma, é recomendable ter configurado o noso navegador de maneira axeitada e, se o precisamos, poderemos consultar o apartado de axuda, onde se explica como debe empregarse esta ferramenta.
