Ferrol360 Un giro a la actualidad comarcal.
FERROL360 | Luns 12 agosto 2013 | 16:32
‘Setembro Concilia’ é o novo programa lúdico e educativo que o Concello de San Sadurniño desenvolverá durante a primeira semana de setembro.
Para despedirse das vacacións do verán e antes de dar a benvida ao curso escolar, os nenos e nenas de entre 3 e 12 anos poderán acudir á Casa da Cultura desde o luns día 2 e ata o venres 6, en horario de nove e media da mañá a dúas da tarde. Algunhas das actividades que poderán realizar son obradoiros de globoflexia, xogos deportivos e piscina ou lecturas colectivas.
O prazo das solicitudes está aberto desde este luns e ata o vindeiro martes 27 de agosto. Terán preferencia as familias empadroadas no concello de San Sadurniño ou aquelas que manifesten unha vinculación laboral co municipio. Os prezos son de 20 euros polo primeiro membro da unidade familiar, 13 polo segundo e 6 euros polo terceiro e sucesivos.
O pago realizarase no momento en que se confirmen as prazas, que serán un total de doce e adxudicaranse por orde de inscrición.
