Pontedeume pon en marcha o programa Madrugadores como medida de conciliación

FERROL360 | Venres 23 setembro 2016 | 11:46

O Concello de Pontedeume ven de poñer en marcha no CEIP Couceiro Freixomil o programa Madrugadores -espazo de almorzos saudables- como medida de conciliación. O programa está dirixido ao alumnado deste centro e será realizado diariamente dende o mes de setembro de 2016 ata o mes de xuño de 2017, en horario de 7:30 a 8:30 horas.

Madrugadores quere responder á necesidade de conciliar a vida persoal, familiar e laboral de moitas familias eumesas. Consistirá nun espazo saudable e lúdico no propio centro escolar para que as nenas e nenos almorcen.

Os interesados en participar aínda se poden inscribir no departamento de Servizos Sociais de Pontedeume. Para máis información se pode chamar ao teléfono 981.433.288.