Home / Ferrol / San Sadurniño / San Sadurniño pide a colaboración da Xunta para preparar o exterior do pazo e poñer en marcha a escola infantil

San Sadurniño pide a colaboración da Xunta para preparar o exterior do pazo e poñer en marcha a escola infantil

FERROL360 | Luns 3 febreiro 2014 | 17:37

O goberno local de San Sadurniño reuniuse este luns en Santiago co director xeral de Administración local, José Alberto Pazos. O motivo do encontro foi pedirlle á Xunta de Galicia a súa implicación na execución das obras de acondicionamento da contorna exterior do pazo da Marquesa e do edificio anexo.

O proxecto, orzamentado en 60.000 euros, pretende mellora-la accesibilidade a uns inmobles que nun futuro próximo albergarán a Casa do Concello, unha escola infantil ou locais empresariais. A actuación inclúe, entre outras cousas, habilitar unha ampla zona de aparcadoiro, ademais de derrubar a antiga queixaría e acondicionar con lousa e zona vexetal o perímetro comprendido entre ámbolos dous edificios. A previsión do Concello é sufragar unha parte dos gastos con axudas autonómicas.

Trala reunión, o rexedor de San Sadurniño, Secundino García, e mailo edil de Réxime Interior e Facenda, Xesús Soto, amosaron a súa «confianza» en que o organismo autonómico participe economicamente nestas obras. Os representantes municipais destacaron a «boa acollida da proposta».

Escola infantil

A carón do pazo da Marquesa está o edificio que se converterá en escola infantil ao inicio do novo curso escolar. Por iso, o Concello de San Sadurniño tamén plantexa solicitarlle á Xunta a súa colaboración.

Recentemente, o consistorio remitiulle unha carta á conselleira de Traballo e Benestar, Beatriz Mato, solicitando unha xuntaza que dea pé a futuras «vías de colaboración» entre os dous organismos.

A escola infantil que está situada na parte baixa do edificio anexo ten unha superficie útil duns 200 metros cadrados, divididos en tres aulas e con espazos de servizo e para o profesorado. A infraestrutura educativa terá capacidade para atender a uns 40 nenos e nenas.

As obras de rehabilitación xa están rematadas e só queda proceder ao seu acondicionamento interior, algo que tamén está pendente dun convenio asinado coa Deputación Provincial.

O modelo de xestión está por decidir, pero unha das opcións que máis convence ao Concello é que sexa a Xunta quen se encargue de incluír o centro na rede autonómica de escolas infantís.

O edificio anexo ao pazo da Marquesa albergará unha escola infantil (foto: Ferrol360)

O edificio anexo ao pazo da Marquesa albergará unha escola infantil (foto: Ferrol360)

Comentar

Su dirección de correo electrónico no será publicada.Los campos necesarios están marcados *

*

En Ferrol360 utilizamos cookies para que tengas la mejor experiencia de usuario. Si continúas navegando, estás dando tu consentimiento para la aceptación de las mencionadas cookies y la aceptación de nuestra política de cookies. Puedes pinchar el enlace para tener más información. ACEPTAR
Aviso de cookies