Home / Actualidad / San Sadurniño redacta un proxecto de mellora da seguridade viaria no eixo principal de Bardaos

San Sadurniño redacta un proxecto de mellora da seguridade viaria no eixo principal de Bardaos

FERROL360 | Luns 4 xaneiro 2016 | 17:25

Bardaos contará ao longo deste ano con dúas novas infraestruturas destinadas a mellorar a seguridade peonil e a do tráfico rodado ao longo do seu principal eixo de comunicación, que conecta a estrada Ferrol-Ortigueira co cruzamento da DP-4905 na Cruz da Raíña.

O proxecto contempla o aglomerado de arredor de 1,5 quilómetros de pista e a construción de 600 metros de beiravías no lugar das Loibas, por un importe estimado de 112.500 euros. Unha contía que se sufragará nun 80 % con fondos xestionados pola Deputación da Coruña mentres que o 20 % restante correrá por conta do Concello.

A idea de aglomerar a estrada que vai desde a conexión coa AC-862 ata a DP-4905 non é nova, de feito, máis da metade deste eixo viario -desde a Cruz da Raíña ata a Bañoca- xa se reparara con este tipo de firme en 2011.

Retraso na VAC

As expectativas existentes naquel momento sobre a construción da Vía de Alta Capacidade da Costa Norte aconsellaron deixar sen amañar o tramo que vai desde a Bañoca até a estrada de Ortigueira, que podería verse afectado polas obras do novo corredor.

Case cinco anos despois, o Concello decidiu retomar a idea inicial e redactou os pregos técnicos para o aglomerado dos preto de 1,5 quilómetros que quedaran pendentes entre a AC-862 e a Bañoca pasando polo lugar da Sanguiñeira.

A obra permitirá que o principal eixo de comunicación de Bardaos -o que vai da estrada de Ortigueira ata a Cruz da Raíña- conte cun firme homoxéneo, máis adherente e con maior durabilidade.

Senda peonil nas Loibas

O Concello tamén incluiu no proxecto unha petición veciñal xurdida nas asembleas dos orzamentos participativos, consistente na construción dunha senda peonil nas Loibas, o principal núcleo de poboación de Bardaos.

Así trazaranse arredor de 600 metros de beiravías de cemento de ata un metro de ancho que discorrerán pola marxe dereita da estrada -sentido Sur a Norte- e por ambos lados nas zonas de maior concentración de vivendas.

O proxecto técnico cifra o prezo de licitación das obras do aglomerado e da senda peonil en 112.500 euros, ive incluído. O importe final sufragarase nun 80% con fondos xestionados pola Deputación da Coruña -que achegará ata un máximo de 90.000 euros-, mentres que a contía restante será asumida con fondos municipais.

Comentar

Su dirección de correo electrónico no será publicada.Los campos necesarios están marcados *

*

En Ferrol360 utilizamos cookies para que tengas la mejor experiencia de usuario. Si continúas navegando, estás dando tu consentimiento para la aceptación de las mencionadas cookies y la aceptación de nuestra política de cookies. Puedes pinchar el enlace para tener más información. ACEPTAR
Aviso de cookies